“Tafiditry ny politika loatra ny fitantanan-draharaham-panjakana”, hoy ny filohan’ny “Syndicat des adjoints d’administration de Madagascar” (Synadjad), tamin’ny mpanao gazety, teny Anosy, omaly. Milaza ny lalàmpanorenana fa tsy azo anaovana politika ny fitantanan-draharaham-panjakana. Nefa tsapa ankehitriny, efa ho roapolo taona mahery: na ny olom-boatendry aza amin’izao, lasa idiran’ny politika. Ohatra amin’izany, ny amin’ireo administratera sivily manokana eny anivon’ny lafintany: be dia be no efa tsy nandalo sekoly intsony no mitana andraikitra amin’izany. Nefa ireny olona ireny no fototry ny fampandrosoana eny ifotony. Fampandrosoana no antom-pisian’ny fanjakana.
Mangataka amin’ny fitondram-panjakana ny hanovana amin’izay ny fitantanana ny administratera sivily hatramin’ izay ry zareo, araka ny nambaran’ny filohan’ny Assistant d’administration, i Lahiniriko Roméo, amin’izao fanavaozana eto amin’ny firenena izao. Ny zava-misy hatramin’ izay, ireo tsy nandalo fiofanana no tena mibahan-toerana amin’ny toeran’izy ireo. Amin’izao fanovana izao, tokony hapetraka amin’izay ny lalàna, indrindra amin’ny lafintany izay olon-kafa no omena ny toerana. Satria havan’ny mpanao politika sy olona ambony. Izay no manimba ny fitantanan-draharaham-panjakana amin’izao. Afa-miasa manerana ireo minisitera misy izy ireo. Lehiben’ny boriborintany no tena asan-dry zareo, nefa misy atao sekretera na irakiraka. Ireo tsy nandalo fiofana no ao amin’ny birao amin’ ny distrika. Araka izany, mangataka ny hananany sata manokana izy ireo.
R. Nd.
French