Namaly ny antso fanentanana avy hatrany. Noraisin’ny minisitra misahana ny Fanavaozana, ny Me Razafimanantsoa Hanitra, tetsy amin’ny birao fiasany etsy Antaninarenina, omaly, ny ambasadaoron’i Japon, Tojima Hitoshi. Nambaran’ity masoivoho ity, tamin’izany, fa tafita tsara ny antso sy ny fanentanana nandritra ny fihaonana niarahana tamin’ireo mpiara-miombon’antoka iraisam-pirenena, afakomaly, teny amin’ny minisiteran’ny Raharaham-bahiny, eny Anosy. Nampahafantaran’ny fitondram-panjakana ny fandaharanasan’ny Fanavaozana, anisan’izany ny momba ny fikaonandoham-pirenena. Voarain’izy ireo ny dingana sy ny paikady entin’ny fitondram-panjakana manatanteraka izany Fanavaozana izany. « Tena nomen’ny fitondram-panjakana lanja ny tamberin’andraikitra sy ny fomba mampiaty », hoy izy. Nohamafisin’ny ambasadaoro fa eo anilan’i Madagasikara hatrany i Japon. Notsiahiviny fa efa nanampy an’i Madagasikara ny governemanta japoney tamin’ny fizotry ny fifidianana. «Mbola vonona hanampy sy hanohana hatrany izahay amin’ny sehatra maro», hoy ihany izy.
Nisaotra sy nankasitraka ny ambasadaoro amin’ny fanohanana ny minisitra misahana ny Fanavaozana. «Tokony halaina tahaka i Japon amin’ny fanamafisana ny resaka demokrasia. Tsy mijanona amin’ny resaka finiavana fotsiny intsony fa tena arahina asa », hoy izy.
Synèse R.
French