Niara-niombom-bavaka tamin’ireo mpino FLM tao Antsirabe ny filohan’ny Fanavaozana, ny Kly Randrianirina Michaël mivady, ny alahady teo. Nisy ny hafatra nampitainy tamin’ireo kristianina sy ny vahoaka tamin’izany.
Nangata-bavaka ho an’ ny firenena ny Filoham-panjakana toy ny mahazatra azy amin’ny fanatrehana ny fotoam-bavaka tahaka izao, ankoatra ny famaliana ny hetaheta sy ny fangatahan’ireo kristianina amin’ny fanampiana ireo ezaka ataon’ izy ireo. Nanentana ny mpino rehetra ny tenany hiady amin’ ny kolikoly. « Anjarantsika tsirairay sy ny olom-pirenena na kristianina ny mampandroso ny firenena amin’ny sehatra misy antsika avy… Firenena nampahantraina i Madagasikara fa tsy firenena mahantra akory. Efa tena miezaka ny fitondram-panjakana miady amin’ny kolikoly fa tsy hanagadra olona hatrany. Mampigadra anefa na ariary aza no ahodintsika amin’ny volam-panjakana », hoy izy tamin’ny anjara fitenenany tao amin’ny FLM Antsirabe.
Nanteriny fa tsy tafarina anatin’ny fotoana fohy ny fahantrana iainan’ny vahoaka malagasy hatramin’izay fa an-dalana miezaka manarina tsikelikaly izany isika, araka ny nambarany.
Tsy hamilafila ny vahoaka
Niantso ny rehetra ny filohan’ny Fanavaozana ny Repoblika, araka ny sehatra misy ny tsirairay eo anivon’ny fanjakana, mba hanompo vahoaka. « Aoka tsy hampijaly na hamilafila azy ireo isika », hoy ihany izy.
Notsiahivina fa efa ao anatin’ny fandaharanasa ny fanamboarana ny lalana mankany amin’ny Toby Farihimena ao amin’ny faritra Vakinankaratra. « Tena ratsy tokoa izany, ankoatra ireo lalana efa amboarina amin’ny lalam-pirenena fahafito (RN7) sy ny fanamboarana na koa fanatsarana ny lalana eto an-tampon-tananan’Antsirabe », hoy ihany izy.
Tsiahivina, nanamarika ny faha-100 taonan’ny vola malagasy tany Antsirabe ny filohan’ny Fanavaozana ny Repoblika mivady, ny faran’ny herinandro teo.
Synèse R.
French