Hotanterahina eto Madagasikara, ny 27 ka hatramin’ny 31 mey, ho avy izao ny fiadiana ny ho tompondakan’ny faritra fahafito, taranja handball na ny IHF Trophy. Fifaninanana, natokana ho an’ny sokajy zandriny lehilahy «cadet» sy «junior». Io no nambaran-dRatsimandao Andriamanga Herilovasoa, filohan’ny federasionina malagasy (FMHB), tao amin’ny tambajotran-tseraserany, ny sabotsy lasa teo. Hampiantrano izany ny lapan’ny fanatanjahantena Mahamasina. Araka ny vaovao nampitainy hatrany, firenena dimy no hiady lohany amin’ity dia i Madagasikara mpampiantrano, La Reunion, Comores, Mayotte ary i Seychelles. Fantatra fa firenena telo amin’ireo ihany no manana solontena amin’ireo sokajy roa hifaninanana dia ny Akion’i Madagasikara, Comores ary i Mayotte. Hita ao amin’ny «cadet», i Madagasikara, La Réunion, Comores ary i Mayotte. Ho an’ny «junior» indray Madagasikara, Mayotte, Comores ary i Seychelles. Marihina fa hisolontena ny faritra fahafito, amin’ny IHF Trophy kaontinantaly, izay tompondaka, amin’ireo sokajy roa ireo. Tsiahivina fa izao vao tafiditra ho anisan’ireo handray anjara amin’ity fifaninanana ity, ry zareo Renione. Heverina, araka izany, fa ho mpifanandrina maozatra ny ekipan’izy ireo na «cadet», aza no handraisany anjara.
Tompondaka
French