Mbola mitohy ny tsy fitoviam-pijery eo amin’ny minisitry ny Jono, ny Pr Maharavo Jean sy ny sekeretra jeneraly vaovao, Ravelomanantsoa Be-Rija. Mihisatra ny asam-panjakana noho ny hambompo manokana. Tsy mbola mankasitraka ny fanendrena ny sekretera jeneraly ny minisitra, tsy manaiky ny fiaraha-miasa hatramin’izao. Manomboka ny fanangonan-tsonia hataony, hanesorana ny olona nametrahan’ny Filohan’ny Fanavaozana ny fitokisany.
Etsy ankilan’izay, tsy manaiky lembenana ny mpitolona sy ny tanora nametraka ny fitondrana. Ampangain’izy ireo ho ataon’ny « Mafia » fitaovana ny minisitra sy ny mpiara-miasa aminy. Ambaran’izy ireo fa misy miaro tombontsoa manokana ny mpiasa sasany ka manao izany ho raharaham-pianakaviana. Fahavalon’ny Fanavaozana no hanasokajian’izy ireo azy. Anisan’ny nitondran’izy ireo fanamarihana manokana ny tale vitsivitsy izay mitady ny hametrahana azy mivady ho tale, na ny namany akaiky.
Efa mizara koa ny sendikà. Misy ny efa nandray ny asany, manatanteraka ny manandrify azy. Milaza ho sarotiny amin’ny harem-pirenena izy ireo ka manao antso avo amin’ny minisitra ny mba handeferan’ny raiamandreny. Ny minisitra izay tompon-toerana ara-politika, ny sekretera jeneraly no lakilen’ny asam-panjakana.
Randria
French