Mandray anjara amin’ny fampivoarana ny toekarena ny fifaninan’ny indostria eto an-toerana. Hahafahan’ny vokatra malagasy miatrika ny fanambin’ny tsena iraisam-pirenena izany.
Nasongadin’ny mpitantana eo anivon’ny Sendikan’ny indostria eto Madagasikara (Sim), filoha teo aloha tao amin’ny vondrona ary filohan’ny Technopet, i Hassim Amiraly, ny Politikam-pifaninanana sy ny fampandrosoana ny toekarena. Novelabelariny ny fifandraisan’ny politikam-pifaninanana eo amin’ny sehatra nasionaly sy ny fahavononan’ny isam-paritra sy manerana an’i Afrika izay iantsorohan’i Madagasikara. Nisongadina nandritra ny dinika fa singa iray manan-danja amin’ny fampandrosoana ny toekarena ny fifaninanana ara-drariny. Manampy amin’ny fampitomboana ny vokatra sy fikarohana zava-baovao, misarika mpampiasa vola ary manatsara ny fahafahan’ny orinasa mifaninana izany. “Entanina ny rehetra handinika ny hoavin’ny toekarena. Ilaina ny mametraka tontolo hahafahan’ny mpisehatra rehetra mivoatra anatina lalàna iraisana sy ara-drariny, izay anisan’ny fototry ny fampandrosoana”, hoy izy. Notsindriny manokana ihany koa ny tombontsoa sy ny fanamby ara-toekarena ho an’i Madagasikara amin’ny fidirana ao anatin’ny Comesa sy ny Zlecaf.
Ara-drariny
Ilaina ny mampiroborobo ny fifaninanana ara-drariny sy voalanjalanja. Fitaovana lehibe enti-manatanteraka izany ny fanatsarana ny kalitao, ny fitondrana zava-baovao. Zava-dehibe, hoy ny Sim, ny fanohanana ny orinasa eto Madagasikara, noho izy mitondra sanda fanampiny, manome asa ary mandray anjara amin’ny fampandrosoana maharitra. Tokony hampitomboina ny fahafahan’ny vokatra malagasy mifaninana mba hiatrehany ny fanambin’ny tsena iraisam-pirenena. Natao nandritra ny andro nasionaly momba ny fifaninanana nokarakarain’ny Filankevitry ny fifaninanana eto Madagasikara ny dinika. Hetsika natao tetsy amin’ny Novotel Alarobia, ny 2 jona teo.
Henintsoa
French