Afaka iray volana, hiatrika ny fifaninanana afrikanina eo amin’ny taranja tenisy, sokajy vehivavy, «Billie Jean King Cup», ho an’ny vondrona fahatelo i Madagasikara. Araka ny fikarohana natao, hotanterahina atsy Gaborone Botswana, ny 13 hatramin’ny 18 jolay ho avy izao izany. Nampafantarin’ny Federasionina malagasin’ny tenisy (FMT), omaly, tetsy Andraharo, ny anaran’ireo mpilalao efatra mirahavavy hiaro ny voninahi-pirenena amin’izany. Anisany Andriantefihasina Elisoa, izay milalao sy manaraka fiofanana any amin’ ny Oniversite any Etazonia. Eo ihany koa Razafinarivo Mirindra, izay manaraka « circuit » matihanina maro any ivelany. Manampy ireo i Harena Voaviandraina, mpilalao milaravinahitra sy manaraka fanazarantena any France sy i Tsantaniony Iariniaina, efa intelo tompondaka an’i Madagasikara.
«Henjana ilay fifaninanana, tsy mametraka tsindry amin’ny ankizy izahay. Ireo firenena mandray anjara, amin’izany koa tsy mora fa efa manana ny lanjany daholo, ohatra, i Tunisie, efa manana mpilalao sangany maneran-tany. Saingy ny tokinaina tsy maintsy eo foana”, hoy Randriantefy Dally, tale teknika nasionalin’ny Federasionina FMT. Ankoatra izay, hiara-kiasa mandritra ity taona vaovao ity ny FMT sy ny orinasa Yas Madagascar.
Fitia Randria
French