Sambany eo amin’ny tantaran’ny Lucadro (Lutte contre l’analphabète et de la drogue) Analamanga no tafakatra N1A ity klioba ity. Fantatra izany taorian’ny fifaninanana nasionaly N1B, natao tany Moramanga, ny faran’ny herinandro teo. Tafapetraka eo amin’ny laharana faharoa ny Lucadro, eo amin’ny sokajy vehivavy, rehefa resin’ny Pintade Amoron’i Mania, tamin’ny isa 80 no ho 63. Voahosotra ho mpilalao namono baolina betsaka indrindra ihany koa, ny mpilalaon’ny Lucadro, i Ravakiniaina Sarobidy. Raha hiverenana kosa ny vokatra, teo amin’ny sokajy lehilahy, norombahin’ny Fandrefiala Analamanga ny anaram-boninahitra, tamin’ny isa 70 no ho 65, nanoloana ny NBE Analamanga. Mpilalao namono baolina betsaka indrindra i Valentin, avy amin’ny NBE. Mpilalao mendrika indrindra, vehivavy, Rajaobelina Noro Mendrikiniavo, avy amin’ny Pintade Amoron’i Mania, ary Raobisaona Toky, avy amin’ny Fandrefiala kosa ny mendrika teo amin’ny sokajy lehilahy. Laharana fahatelo ny Phoenix Vakinankaratra, teo amin’ny sokajy vehivavy, ny ASB Itasy kosa ny teo amin’ny lehilahy. Tsiahivina fa nahazo lelavola 2 500 000Ar avy ny ekipa tompondaka nandritra ity fiadiana ny tompondakan’i Madagasikara N1B, taranja basikety, ity.
Mi.Raz
French