Anisan’ny fihaonana goavana, andrasan’ny rehetra, ny donan’ny Uscar sy ny CEA Andranomanalina. Ho toy ny famaranana kely io kopaka io. Vonona ny hanala vela sy haka fandresena ny ekipan’ny kaominina Antananarivo Renivohitra.
“Hatreto, tsy misy mieritreritra izany Uscar izany hanao famaranana amin’ity Top 12 ity”, hoy i Berthin Zoto, mpandrindra teknika ny ekipan’ny kaominina Antananarivo Renivohitra, nandritra ny fanomanan-tena nataony, ny alakamisy lasa teo, teny amin’ny Kianja Alarobia. Raha tsiahivina, hifandona amin’ny CEA Andranomanalina izy ireo, ny alahady ho avy izao, eny amin’ny Kianja Makis Andohatapenaka. Nomarihin’i Tony, kapitenin’ny ekipa fa matoa tonga amin’izao dingana izao ny Uscar dia nisy ny fiaraha-mientana sy ny ezaky ny tsirairay. “Efa vonona ara-batana sy ara-tsaina ireo mpilalao rehetra ary eto dia misaotra
ny Filohan’ny delegasionina manokana izahay, amin’ny fanohanany”, hoy i Herilaza, filohan’ity ekipa ity.
Ankehitriny, miverina amin’ ny heriny tanteraka ny Uscar ary tapa-kevitra ny rehetra hamerina indray ny anaram-boninahitra ho eo an-tanan’izy ireo. Manohana ny ekipa ny filohan’ny delegasiona manokana, Ralambomanana Feno sy ny fitaleavana fanatanjahantena sy fanabeazana. Manao antso avo amin’ireo mpiasan’ny kaominina milalao ao amin’ny CEA ny tomponandraikitra hiverin-dalana, hanatevina ny ekipa satria izay no fifanarahana tamin’izy ireo.
“Vonona ny hanome ny tsara indrindra sy ny heriny rehetra ho an’ny Uscar ireo mpilalao ka miantso ireo mpanohana”, hoy i Jacquis, mpanazatra. Nomarihin’i Berthin Zoto, fa tsy mifidy izay ho mpitsara ny lalao na vazaha na gasy izy ireo ary hanaiky izay vokatra eo. Na izany aza, mampalahelo ihany, hoy izy, raha hatao vahiny satria very maina ny nanofanana azy ireo, hatramin’izay. Ny lalao manasa-dalana ilany kosa hifanandrinan’ny Cosfa sy ny FTM Manjakaray.
Tompondaka
French