Natao, omaly, tetsy amin’ ny Mesupres Fiadanana, ny fampahafantarana sy fampiofanana momba ny sehatra niomerika “Habilitation”, “Accréditation” ary “Équivalence” HAE. Niarahana tamin’ireo tomponandraikitry ny toeram-pampianarana ambaratonga ambony miankina sy tsy miankina amin’ny fanjakana izany.
Miisa 546 ireo antontan-taratasy voaray hatramin’ny 10 jolay 2026, raha manodidina ny 250 kosa ireo antontan-taratasy afaka hodinihin’ ny vaomieram-pirenena momba ny “Habilitation” (CNH) amin’ ity andiany ity.
Mandalo dingana fanasokajiana sy fanamarinana eny ifotony ary “expertise” ataon’ ireo manam-pahaizana manokana ny antontan-taratasy rehetra. Vinavinaina hanomboka ny 21 septambra 2026 ny fivoriana ara-potoan’ny CNH sy CAN.
Ity sehatra niomerika HAE ity no hanamora ny fitantanana ny dingana rehetra amin’ny fangatahana “Habilitation”, “Accréditation” ary “Équivalence”.
Anisan’ny vina lehibe iasan’ ny Mesupres ny fanatsarana ny kalitaon’ny fampianarana ambaratonga ambony. Miantoka ny fanarahana ny fenitra sy ny kalitao eny amin’ireo toeram-pampianarana ambaratonga ambony ny rafitra HAE izay tsy azo tsinontsinoavina.
Maro ireo sekoly ambony tsy miankina amin’ny fanjakana no mitsangana kanefa tsy mbola anatin’ireo fenitra hahatafidirana anatin’ny rafitra ka mila fanatsarana sy mandamina ny antontan-taratasy hahazoana izany. Hentitra ny fanaraha-maso ataon’ny minisitera.
Tatiana A
French