Miavaka ny “Fitampoha” amin’ity taona 2026 ity. Manamarika izany manokana ny maha efa eto an-tanindrazana ny kabeson’ny Ampanjaka Toera na Andriamilafikarivo. Tsy manary ny maha izy azy ny sakalavan’i Menabe.
Nisokatra omaly, haharitra folo andro, ny “Fitampoha 2026”, ao Belo ambonin’i Tsiribihina. Ambohipihaonan’ny foko Sakalava ao Menabe ny ao an-drenivohitry ny distrika misy ny fandriany fehizay ao Mahavelonarivo. Tanterahina mandritra ny fotoana avokoa ireo fomba amam-panao nampiavaka azy ireo. Natomboka tamin’ny fanokafana ofisialy izany, ka notronin’ny solontenam-panjakana sy olom-boafidy. Anisan’ izany ny lehiben’ny faritra, ny kolonely Philippe Aunezifort sy ny depiote Saory Christian. Ny Ampagnito Harea Tinahy Tsialia Georges Kamamy, taranaky ny Ampanjaka kosa no nanokatra izany tamin’ny alalan’ny “Variavary” na ny fandraisam-bahiny nentim-paharazana. Nitohy tamin’ny vono aomby sy fanokafana valamena. Nofaranana tamin’ny “Tsoky Motro” na fiaretan-tory sy fiantsoana ireo Dady izany, omaly.
Hitohy amin’ny fanokafana zomba izany anio. Hivoaka ao ireo “reliques” hampandroana amin’ny zoma heriny ao Tsiribihina. Hamonjy ny toerana hitobian’ny vahiny mpanasina sy mpandala ny fomban-drazana eny Ampasy izany aorian’izay. Hofaranana amin’ny “Kolondoy” hanehoana ny hira nentim-paharazana sy alim-pandihizana iarahan’ny daholobe ny hetsika.
Marihina fa fomba amam-panao tanterahina isaky ny fito taona ny Fitampoha. Tsy nisy komity manokana ny fikarakarana azy tamin’ity taona ity fa noraisin’ny fianakaviana an-tanana avokoa.
Zo ny Aina
French