Hitodika kokoa amin’ny fanomezan-danja ny fahasamihafana sy ny fanajana ny zo fototra ny paikadin’ny Mouvement pour la différence (M4D) ho an’ny efatra taona manaraka.
Araka ny andininy voalohany (1) ao amin’ny fanambarana iraisam-pirenena momba ny zon’olombelona, manamafy ny fitoviana sy ny zo ho an’ny rehetra ny M4D. Miady izy ireo ny mba tsy hiteraka fanilihana ny fahasembanana, ny toe-tena varira, ny fahasamihafan’ny rafitra ara-tsaina…
Tokony hampiharina andavanandro amin’ny dingam-piainan’ny olona miaina miaraka amin’ny fahasembanana sy ireo mpanampy mikarakara olona manana fahasembanana ny fitoviana, ny fahasamihafana ary ny fampiatiana.
Dieny mbola kely, manome fandraisana an-tanana mialoha hitiliana ny olana eo amin’ny zaza ny Maison de l’autisme eto Antananarivo. Foibe manana ny fahaiza-manao mifandraika amin’izay. Mandritra ny androm-piainana, zava-dehibe ny fanajana ny zo. Anisany ny fisitrahan’ny olona manana fahasembanana zo sy fahasalamana ara-pananahana. Efa manana ny Mallette SSR, ampiasain’ny mpisehatra rehefa miasa eny an-kianja, ny fikambanana. Endrika iray isehoan’ny fampiatiana ny fampiroboroboana asa miteraka loharanom-bola ho an’ny olona miaina miaraka amin’ny fahasembanana, hanomezana azy fahaleovantena sy fivelarana eo anivon’ny fiarahamonina. Tao anatin’ny 10 taona nijoroany, miezaka manapariaka ireo fototra ireo ny fikambanana 800 mivondrona ao anatin’ny M4D hanova ny foto-pisainana.
Ilana fanohanana ny fanatanterahana ny asa ka manentana ireo rafitra samihafa ny fikambanana hifarimbona hahatonga ny paikady ho vokatra mivaingana ho an’ny olona manana fahasembanana. Misehatra amin’ny faritra 10, ahitana sampana tsirairay ny fikambanana amin’izao fotoana. Anisan’ny nampivoatra ny fahafantarana sy ny fahatsapan’ny fiarahamonina ny fahasembanana sy ny fahasamihafana ny fipariahan’ny fikambanana tany amin’ny faritra.
Vonjy
French