Nahatsikaritra ny Sendikàn’ny inspekteran’ny ladoany eto Madagasikara (SIDM) fa nisy tranga maromaro mahakasika ny mpiasan’ny fadintseranana tato anatin’ny volana vitsivitsy. Mampametra-panontaniana azy ireo ny fanajana ny lalàna sy ny fomba nitaterana ny zava-nitranga tamin’ny vahoaka. Misy ny fiampangana sasany tsy mbola voaporofo, eo ny fanaratsiana ny fadintseranana iray manontolo. Ho an’ny SIDM, manimba ny endriky ny fadintseranana ny tsy fandraisana andaikitry ny tomponandraikitra sasany ao amin’ny ladoany.
Manoloana ireo, takin’ity sendika ity ny hanavahana mazava ny maha andrimpanjakana ny fadintseranana sy ny mpiasa mety ho voarohirohy amin’ny raharaha iray. Hajaina ny dingana sy ny fomba fiasa rehetra voalazan’ny lalàna. Hajaina ny fiheverana fa tsy meloka ny olona iray, raha tsy voaporofo araka ny lalàna ny helony, ka tsy tokony hambara ampahibemaso. Takina ny fandraisana andraikitr’ireo tomponandraikitry ny fadintseranana.
Tsy manohitra ny fanadihadiana sy ny fanasaziana ireo nanao fahadisoana ny SIDM. Manohana sy vonona handray anjara amin’ny fanavaozana ao amin’ny ladoany, ao anatin’ny fanajana ny lalàna, izy ireo.
Njaka A.
French