Antoko RPMU sy ny « Russie uni »: « Ilana fifanajana ny tombontsoa iraisana »

Hifarana, anio any Rosia ny « Assemblee générale du Mou­vement international, Forum des partisans de la lutte con­tre les pratiques modernes du néocolonialisme Pour la liberté des nations ». Anisan’ ny voaasa amin’izany ny an­toko « Reveil patriotique de Madagascar uni – RPMU ». Mitarika ny delegasionina any an-toerana kosa ny filohany, Rakotonirina Richard.
Nihaona tamin’ny solontenan’ny African Initiative izy ireo, omaly.
Nifantoka tamin’ny fifanakalozan-kevitra, ny fifampizarana traikefa ary ny fijerena ireo sehatra iaraha-mientana sy fifandraisana eo amin’ny RPMU sy ny African Initiative ny fihaonana. Tahaka izany koa ny fihaonana amin’ny an­toko « Russie Unie », tarihin’ ny filoha Rosianina, Vladimir Poutine. « Niarahana nandi­nika ny hanokafana lalana ho amin’ny fifandraisana sy ny fifaneraserana amin’ny hoavy. Tsy maintsy mifototra amin’ny fifanajana sy ny tombontsoa iombonana anefa izany », hoy ny RPMU.
Nanterin’izy ireo fa din­gana amin’ny fanamafisana ny fifandraisana sy ny fanitarana ny fiaraha-mientana amin’ny sehatra iraisam-pirenena izao. Maro ny fihaonana an-tsisiny notanterahan’ireo delega­sion’ny RPMU mandritra izao famitana iraka ataon’izy ireo any Moscou – Rosia izao.
Tsiahivina fa mahatratra 60 mahery ny firenena mandray anjara amin’ity fihaonambe iraisam-pirenena ity ary hany antoko misolo tena an’i Madagasikara amin’izany ny RPMU.
« Efa manana toerana sahady eo amin’ny sehatra iraisam-pirenena noho ireo ezaka goavana sy fandraisan’ anjara nentiny teto amin’ny fiainam-pirenena nandritra ny heritaonan’ny fitondrana Fa­navaozana ny RPMU », hoy ny filohany, Rakotonirina Richard.

Synèse R.

Partager sur: