Vao nahafatesan’olona iray ny herinandro lasa teo, fiara tsy mataho-dalana iray indray tra-doza tetsy amin’ny Rocade Iarivo, omaly.
Nivadika nananika ny afovoan-dalana nisy andrin-jiro, potika tanteraka, ny fiara 4×4 iray, marika Ford teny amin’ny Rocade Iarivo, omaly hariva, tamin’ny 6 ora sy sasany. Nandeha mafy ilay fiara avy amin’ny lalana mampitohy an’i By-pass sy Ambohimahitsy. Tsy nanampo na inona na inona ny mpamily. Nisy fiara marika Mercedes nanana olana teknika anefa nandeha tamin’ io lalana io ka voatery nijanona tamin’ny sisin-dalana. Nametraka ahi-maitso ho famantarana ny tompony. Anatin’ny andro maizina, tsy nahatsikaritra ny fisian’io fiara azon’ny fahasimbana io ny mpamilin’ilay fiara 4×4 marika Ford. Nandona fiara iray hafa ity farany rehefa niezaka niala ilay fiara nibahana lalana. Tafakatra teny amin’ny fefy vato manasaraka ny arabe. Nianjera vokatry ny dona ny andrin-jiro teo afovoan-dalana. Naratra ny mpamily ity fiara tra-doza ity. Marihina, tsy fitandreman’ny mpamily sy tsy fanajana ny fitsirihana teknika ny fiara matetika no antony miteraka ny loza toy izao. Vao afakomaly, zazavavy iray maty voadonan’ny fiara tao Ilempona, anatin’ny RN7.
Tsiferana R.
French