Omaly, nisy ny valandresaka ho an’ny mpanao gazety, nataon’ny tomponandraikitra maro samihafa, ahitana ny avy eo anivon’ny orinasa Manoova sy ny Universal Music ary ireo mpanohana maro samihafa mahakasika ny dingana vaovao diavin’ny Moozik sy ny fampisehoana ataon’izy ireo amin’ny alahady izao. Tao anatin’izany no nampahafantarana misimisy kokoa ny mahakasika ny fampisehoana hataon’i Franglish, rahampitso, eny amin’ny Lapan’ny kolontsaina sy fanatanjahantena Mahamasina. Franglish izay mpanakanto miangaly ny gadona Rap frantsay. Hifampizara sehatra amin’ity mpanakanto ity, mandritra izany fampisehoana lehibe izany, i Shyn, anisan’ny Malagasy mpanakanto manana ny maha izy azy.
Mitohy hatrany ny fahombiazana ho an’ny orinasa Manoova, amin’ny alalan’ny Moozik. Ny Moozik izay sehatra iray hampivelarana ny hira sy hanomezana tombony kokoa ireo mpanakanto tompon’ny hira. Tanjona ao anatin’izany ny fampiroboroboana ny zavakanto malagasy sy fanomezana tosika ireo Malagasy mpihira. Sehatra iray eo anivon’ny tambajotra internet, ahitana hirana Malagasy mpanakanto.
Antony namoronana azy ny famaliana ny filàna sy ny zava-misy ankehitriny iainan’ ny Malagasy. Hirana malagasy mpanakanto manodidina ny 4 000 no hita ao anatin’ny Moozik. Nanomboka nampiasain’ny rehetra izy io ny volana jolay 2024. Anisan’ny fanamby sy vinan’ny orinasa Manoova ny fanamorana ny fiainana andavanandron’ny vahoaka amin’ny alalan’ireo vokatra maro samihafa vokarin’izy ireo.
“Manome ny tsara kokoa hatrany”
Fangatahan’ireo mpampiasa ny Moozik, taorian’ny fampidirana ireo hirana Malagasy mpanakanto, ny tokony hivelaran’ny Moozik amin’ireo vahiny mpanakanto. Ho famaliana izany no niarahan’ny orinasa Manova niasa tamin’ny Universal Music, ho fanatsarana ny Moozik sy hamaliana ny fangatahana sy filàn’ny mpampiasa azy. Ny Universal Music izay vondrona misehatra amin’ny zavakanto. Anisan’ny sangany eto amin’izao tontolo izao izy amin’ireo orinasa misehatra amin’ny fampialana voly sy mozika. Anisan’ny iseharan’ny Universal Music Groupe ny fanaovana fandraketana, fanotana mozika, sy ny asa rehetra manodidina ny famokarana. Ny vina iraisan’ny roa tonta amin’ny fampiroboroboana ny zavakanto. Eo ihany koa ny fahombiazan’ny orinasa Manoova, amin’ ny alalan’ny Moozik, sy ny traikefa ananan’ny Universal Music.
Ahitana hirana vahiny mpanakanto, araka izany, ao amin’ ny Moozik, manomboka izao. Hira sy mpanakanto mifanaraka amin’ny filàna sy fangatahan’ny mpampiasa no ho hita ao anatin’ny Universal Music Group. Ho fanamarihana izany dingana vaovao ho amin’ny tsaratsara kokoa izany no nanaovana ny fampisehoana “Nexthope”, iarahana amin’i Franglish sy Shyn.
Mpanakanto samy sangany
Tsy zoviana amin’ny Malagasy intsony, indrindra ireo mpankafy mozika ankehitriny, i Shyn. Manana ny mampiavaka azy ny hirany. Anisan’ny mpanakanto manana ny maha izy azy eto Madagasikara izy, ankehitriny. I Shyn no hanokatra ny fampisehoana, ny alahady 22 septambra 2024, eny amin’ny Lapan’ny kolontsaina sy ny fanatanjahantena, amin’ ny alalan’ireo hira nahafantarana sy nankafizan’ny maro azy. “Efa vonona tanteraka ny ekipa hanome seho miavaka ho fanomezana fahafaham-po ny mpankafy”, hoy i Shyn. Franglish sy ny tariny kosa no handimby an’i Shyn amin’ny fanafanana ny sehatra mandritra ny fampisehoana. Ankoatra ny hira, anisan’ny mampiavaka ny tarika Franglish, rehefa miaka-tsehatra, ny dihy. Efa vonona ihany koa izy ireo hianoka fampisehoana miavaka miaraka amin’ny mpankafy eto Madagasikara. Haharitra adiny telo eo ho eo ny fampisehona, araka ny nambaran’ny mpikarakara. Miankina amin’ny hafanan’ny fiarahana no faharetan’izany, araka ny nambaran’ireo mpanakanto mpandray anjara.
Lin
Sary : Fanou
French