Voasambotry ny zandary ny mpisoloky roa lahy mpanaparitaka vola sandoka tao Tsaramody, kaominina Mandrosohasina, distrikan’Antsirabe II, afakomaly. Nitondra vola sandoka roa alina miisa 10 izy roa lahy. Manatona mpivarotra, mody mividy zava-pisotro ireto mpisoloky ireto. Manome ny vola sandoka ary mahazo vola fameriny. Mifindra mpivarotra hafa indray izy ireo aorian’izay. Mamerina ny fisolokiana amin’ny mpivarotra hafa indray izy ireo. Tsikaritry ny mponina manodidina io teti-dratsin-dry zalahy ireto io ka nampandre ny mpitandro filaminana ny mponina. Nitsirika teny ifotony ny zandary. Tra-tehaka izy roa lahy. Nosavaina tany am-paosiny ka nahatrarana vola sandoka miisa 10. Nogiazana ireo taratasy nampangalana tahaka endrika vola ireo. Nentina natao famotorana ireo roa lahy mpisoloky ka hatolotra ny fampanoavana aorian’izay.
Tsiferana R.
French