Tanterahina rahampitso, eny amin’ny trano famakiam-boky «Mille feuille» Ankorahotra, ny hetsika «Kafe literera», iarahana amin’ny mpanoratra Johary Ravaloson. Ny mahakasika ny boky «Fitiavana- Tanindrazana- Fozaorana» no resahina ao anatin’izany. Ankoatra izay, hisy ihany koa ny tafa sy fizarana atolotr’ity mpanoratra manana ny maha izy azy ity amin’ireo mpankafy azy eto Madagasikara. Tanjona ao anatin’izany ny hanomezana fanararaotra ho an’ ireo mpanoratra eto Madagasikara, indrindra ireo vao misandratra, ireo paikadim-pahombiazana avy amin’i Johary Ravaloson.
«Fitiavana- Tanindrazana- Fozaorana», “Tribunal de cailloux”. Ireo no anisan’ny sanganasa nahafantaran’ny maro an’i Johary Ravaloson. Mampiavaka ity Malagasy mpanoratra iray ity ny fahaizany mampiasa ny teny rehefa manao asa soratra. Anisan’ izany ny lohatenina asa soratra izay fohy sy tsotra ary mazava. Porofon’izany ny boky navoakany farany «Fitiavana- Tanindrazana- Fozaorana», izay nanakoako hatrany ivelany raha vao nampahafantariny fotsiny.
Ao anatin’ny fandalovana eto Madagasikara ity Malagasy mpanoratra ity, amin’izao. Maro ny hetsika iarahana aminy ao anatin’izay fandalovany eto an-toerana izay. Marihina fa ankoatra ny fahombiazana amin’ny boky izay navoakany. Fifaninanana sy hetsika eo amin’ny tontolon’ny haisoratra, teto an-toerana sy tany ivelany, no efa nandraisany anjara.
Lin
French