Manaparitaka fitaovam-piadiana tsy ara-dalàna, lehilahy iray niakatra fampanoavana tetsy Anosy, omaly. Notanana am-ponja, miandry ny fotoam-pitsarana izy.
Nivarotra bala tena izy, naiditra am-ponja vonjimaika eny amin’ny fonjan’Antanimora, ny lehilahy iray, omaly. Manana toeram-pivarotana manokana izy teo Antanimena. Sarontsaromany amin’ny famarotana « airsoft » na ireny fitaovam-piadiana plastika maka tahaka amin’ny tena izy ireny izany. Nanaovan’ny mpitandro filaminana eo anivon’ny polisim-pirenena fitsirihana manokana ny tsenan’io lehilahy io. Nahitana bala tena izy maromaro tsy manana taratasy mazava tao aminy. Notsirihana manokana teny anivon’ny Polisy siantifika sy teknika ireo bala ireo. Voaporofo fa bala tena izy. Nosamborina avy hatrany moa io lehilahy io, ny 27 septambra. Natolotra ny fampanoavana, omaly, izy taorian’ny famotorana. Nidoboka am-ponja taorian’izay.
Mampirongotra ny asan-jiolahy
Anisan’ny mampirongatra ny asan-jiolahy eto an-dRenivohitra ny fiparitahan’ny bala tsy ara-dalàna tahaka ity tra-tehaky ny mpitandro filaminana tetsy Antanimena ity. Manao mora ny fisitrahan’ireo olon-dratsy ny bala hampiasainy amin’ny asa fanafihana sy fandrobana vokatry ny fisian’ny mpivarotra bala tsy ara-dalàna. Na izany aza, manao ny fomba rehetra hamongorona ireo minia mivarotra io karazana bala io eto an-toerana ny eo anivon’ny polisim-pirenena. Raha tsiahivina, nitrangana fanafihan-jiolahy teny Ampasanimalo ny 1 oktobra teo. Naratra vokatry ny fifandonana tamin’ny jiolahy ny polisy iray eo anivon’ny USI. Nankahery manokana ity farany moa ny minisitry ny Filaminam-bahoaka, Contrôleur Général de Police, Rakotoarimanana Herilala, omaly.
Tsiferana R.
French