Navotsitr’ireo mpaka an-keriny tao Andranonampanga, kaominina ambanivohitr’Ambakireny, distrikan’i Tsaratanàna ny vehivavy iray 61 taona nalain’ny dahalo an-keriny rehefa avy nandoa vola 70 tapitrisa Ar ny fianakaviany. Ny 23 septambra 2024 alina, nalain’ny dahalo an-keriny tao amin’ny fokontany Morarano Chrome Amparafaravola ity renim-pianakaviana ity. Nanao fanarahan-dia avy hatrany ny zandary ka nifanehatra tamin’ireo dahalo tao Ambavahaditany Andranonampanga. Raikitra ny fifandonana ka lavo tao anatin’izany ny dahalo roa lahy, isan’ireo tompon’antoka amin’ny fakana an-keriny ity ramatoa ity. Ankoatra ireto malaso voatifitra ireto, nisy ihany koa ireo azo sambo-belona saingy mbola ao anatin’ny fanadihadiana azy ireo ny zandary any an-toerana. Voalaza fa noteren’ireo dahalo hanome vola ho takalon’aina ny fianakaviany. Fantatra tao anatin’ny famotorana fa tsy nety nifampiraharaha tamin’ny mpitandro filaminana ny fianakavian’ilay niharam-boina. Navotsotr’ireo malaso ihany anefa izy rehefa azon’izy ireo ny vola. Nentina nanaovana fizahana eny anivon’ny tobim-pahasalamana izy.
J.C
French