Azo atao manomboka izao ny misintona vola Orange money eny amin’ny « Distributeur automatique de billet » (Dab) ny Société Générale (SG) manerana ny Nosy. Mitovy sarany toy ny eny amin’ny Cash point ny fanaovana izany. Tombony ny hahafahana misintona vola amin’ny fotoana rehetra eny amin’ireo Dab 139 ny SG tsy ampiasana karatra. « Roa minitra raha ela indrindra ny fotoana lany hisintomana ny vola taorian’ny andrana natao », hoy ny tomponandrakitry ny Orange money, Rabevoary Maholinirina, omaly, tetsy amin’ny Orange Digital Center, Soarano, nandritra ny fampahafantarana ny tolotra.
Tanjon’ny fiaraha-miasan’ny roa tonta ny hampiroborobo ny tolotra ara-bola sy hamaliana ny filan’ny mpanjifa. Manakaiky ny mpanjifa hatrany ny Orange money amin’ny alalan’ireo tolotra samihafa omeny raha toa ka paikady hanamoran’ny SG ny fifandraisana sy hanomezana fahafaham-po ny mpanjifa. Mifanandrify amin’ny tolotra Afindrafindraon’ny Orange money ity tolotra vaovao ity ka ahafahana mandefa vola ao amin’ny kaonty eny amin’ny banky amin’ny alalan’ny Mobile money sy mifamadika amin’izay.
Henintsoa H.
French