Nitrangana lozam-piarakodia teny Mahitsy, omaly hariva. Fiara mpanao rallye iray no nifatratra tamina mpitondra moto nanao taingin-telo. Nisy fifaninanana momba ny hazakazaka fiarakodia teny amin’ iny faritra iny. Noheverin’ireo mpandeha moto fa hoe tsy misy fiara mandalo intsony tamin’ny lalana nandehanan’ izy ireo ka tsy taitra akory nandeha tamin’ny lalana nandehanan’ny rallye. Fotoana fohy taorian’izay, iny nipoitra tampoka nandeha mafy ny rallye iray ka notrongisiny avy hatrany ilay moto. Vokany, nivadibadika ambony ambany ny fiara. Nieren-doza ny mpanamory sy ny mpanampy azy. Ireo mpitaingina moto kosa nipitika lavitra noho ny dona mafy nahazo azy ireo. Maty tsy tra-drano ny vehivavy iray nandeha tamin’io moto io, raha naratra mafy kosa ireo roa lahy niaraka taminy. Mafy ny fifandonana satria tapaka mihitsy ny taolan-tongotry ny lehilahy iray nandeha tamin’ilay moto. Nahitana fahasimbana ihany koa ilay fiara mpanao rallye nifandona tamin’ilay moto.
J.C
French