Fantatra, omaly, ireo ekipa 21 amin’ny 24 efa tafita hiatrika ny “Can Maroc 2025”. Ankoatra an’i Maroc, mpampiantrano, ao ihany koa i Côte d’Ivoire, tompondaka farany, i Cameroun, Comores, Soudan, Benin, … Firenena iray goavana amin’ny baolina kitra tsy miatrika ity Can ity kosa i Ghana. Laharana farany tao amin’ny vondrona “F” izy ireo.
Hikarakara hetsika fampianarana ny taranja tenisy anaty efitrano, Padel, ny klioba avy any Atsinanana, Padel Club Tamatave, “Masteva”, ny 16-22 desambra ho avy izao, any Toamasina. Ilay mpilalao efa nandrafitra ny ekipa nasionaly malagasy, i Miary Zo, no hanofana amin’izany. Tsiahivina fa ireo ankizy 7 hatramin’ny 13 taona ihany no afaka mandray anjara.
Nisongadina tamin’ny lalao nihaonan’ny St Denis la Reunion sy ny JSSP, i Berajo, Malagasy vodilaharana mila ravinahitra atsy La Réunion, izay milalao ao amin’ny St Denis FC. Nandresy tamin’ny isa 4 no ho 1 ny klioba misy an’i Berajo ary nahatafiditra baolina tamin’ity fifanandrinana ity ny tenany.
Hotanterahina anio, any Maroc, ny lalao hihaonan’ny Makis de Madagascar sy ny liona tsy voafolak’i Cameroun. Fihaonana izay tafiditra amin’ny fifanintsanana hiadiana ny tapakila hiakarana ao amin’ny Top 8, taranja rugby, lalaovin’olona 15. Ambony ny herijika ho an’ny Makis, efa nifankazatra hatramin’ny fahakeliny ireo mandrafitra ny ekipa nasionaly ireo, hoy i Rable, Makis mpilalao.
French