Hiatrika ny lalao sakana eo amin’ny fifaninanana Top 12, hifandona amin’ny klioban’Anatihazo ny Uscar. « Tratra ny tanjona satria efa tonga amin’ny ankatoky ny famaranana ny ekipa », hoy ny fanazavan’ny mpanazatra ny klioban’ny Uscar, Razafindratsimba Marcelin. Tanjona amin’ity taom-pilalaovana ity, ny hampiakatra ny lentan’ny ezaka efa vita tamin’ny taon-dasa. Hanome ny fankaherezana rehetra ho an’ny ekipa hatrany ary vonona hiatrika ny lalao ho avy izahay, raha ny nambaran’ny kapitenin’ny Uscar, Razafindratsimba Anthony. Hifandona amin’ny ekipan’Anatihazo, hanala vela, izy ireo satria efa resin’io ekipan’Anatihazo io tamin’ny lalao isam-bondrona. « Lalao efa hita io hatrehanay io. Hiezaka haka ny fandresena izahay mba hiakarana amin’ny manasa-dalana», hoy hatrany io kapiteny io. Marihina, nanatontosa fanazarantena niarahan’ny samy mpilalao rehetra mandritra izany ny klioban’ny Uscar tetsy amin’ny Kianja monisipaly Alarobia, ny alakamisy 16 janoary teo.
Tsiferana R.
French