Manaja ny fomba sy ny kolontsaina malagasy ny orinasa Base Toliara. Nankasitraka ary nitsodrano ny tetikasa ny olobe sy ny raiamandreny any an-toerana, satria tsapan’izy ireo fa hitondra fampandrosoana izany.
Toerana hitrandrahan’ny tetikasa Base Toliara ny any Ranobe, ny fokontany Ranobe, kaominina Ankilimalinika, disitrika Toliara II. Nisy ny famonoana omby, nentina nanamarihina izany, fotoana vitsy lasa izay. Fotoana ihany koa nampahafantaran’ny fitondram-panjakana tamin’ny mponina fa nahazo alalana hiverina hisokatra ny orinasa. Nisolo tena ny governora Atsimo Andrefana, Tovondrainy Edally, ny lefitry ny sefo distrika Toliara II sy ny DID, Heriharivelo Risite. Nambaran’ity farany fa maro ny tombontsoan’ny mponina, avy amin’ireo fandaharanasa sosialy, mitentina an-tapitrisany dolara. Eo koa ny haba sy tamberim-bidy ho an’ny faritra Atsimo Andrefana. Toraka izany koa ny asa tsy mivantana ateraky ny tetikasa ho an’ny sehatra tsy miankina.
Nilaza Rafesy, mponina any Ranobe, «tsy ao anatin’ny ala Mikea ny faritra hitrandrahan’ny Base any Ranobe, fa 15 km miala an’i Benetsy. Vaovao diso ny tsaho haely milaza fa manimba ny tontolo iainana ity tetikasa ity, ka tsy adala izahay manohana azy». Nambaran’i Miandry, mponina any Ranobe, fa «hisy ny fanorenana sekoly ao amin’ny kaominina Ankilimalinike, ny famindrana ny fasana, ny fanonerana ara-bola amin’ny fananantany, noho ity tetikasa ity».
Faly ary manantena ny tombontsoa ho azo ny filoha lefitry ny fokontany Ranobe, Ramanoely Toto.
Fandaharanasa tontolo iainana
Notsorin’ny ben’ny Tanàna vonjimaika Ankilimalinike, fa tsy hanimba ny fizahantany ny tetikasa Base, fa vao mainka aza hampitombo ny mpitsidika. Maro ny fandaharanasan’ny Base amin’ny lafiny tontolo iainana. Tsy hokitihina ny hazo baobab sy ny torapasik’i Mangily, tsy araka ny lazain’ny depiote any an-toerana hatramin’izay.
Njaka Andriantefiarinesy
French