Mila jadona

Noho ny fifanarahana dia nidina nivarotra anaty lalana ny mpivarotra amoron-dalana. Mainka hanampy trotraka ny fitohanan’ny fifamoivoizana sy hanakorontana misimisy  ny tanàna izany. Tsy hidirana lalina ny amin’izay fa ny tokony hilofosana izao dia ny fandresena lahatra ireo mpivarotra mba hanaiky ilay vahaolana maharitra amin’ny tsena voatokana sy nandaniam-bolabe ireny.
Mahonena ilay firenena raha homen-danja hatrany ity midongy dia mahazo ity. Tsy vitan’ny midongy fa ratsy fangataka mihitsy. Ho boribory vetaveta eto izany ilay kolontsaina samy manao izay mahafalifaly ny fony. Averina ombieny ombieny fa io toe-tsaina tsy tia lamina sy tsy azo tenenina io no rangory fototry ny afo amin’izao fahantrana lalina mianjady amin’ny firenena izao.
Tsy ny firenena ihany no sahirana fa raha mandinika isika, ny isan-tokantrano izao no tena mifafa ny kihony. Mandrora mitsilany ny ankamaroany, tsy mahita afa-tsy ny ambany orony. Fady amin’ny ankamaroan-dRamalagasy izany hitsinjo lavitra izany. Ny tena zava-doza, mainka hahazo vahana ny fitiavan-tena. Hany ka tsy misy miraharaha izay tombontsoa iraisana intsony.
Mila fitondrana sahy mijoro, fanjakana matanjaka ny eto Madagasikara amin’izao fotoana izao. Raha tsy izany dia aleo miandry ny amiraly Ratsiraka Didier, ” hifoha ho azy amin’ny torimasony tokoa” isika vao handroso. Ilay toe-tsaina takina amin’ny fampandrosoana no efa tsy ao! Kolontsaina toloram-potsiny, lavitry ny fifehezan-tena no manjaka. Tena lo, ka mila mandrava hatrany amin’ny fotony mihitsy angamba! Mila jadona!

r.r