Fahombiazana ! Nahatratra 374 ireo mpifanintsana tonga namaly ny antso nandritra ny fifaninanana karate, “Coupe Internationale de Tana”, andiany voalohany, izay notontosaina ny faran’ny herinandro teo, tao amin’ny Lapan’ny Fanatanjahantena Mahamasina. Nahitana atleta vahiny 40, avy amin’i France, Mayotte, sy La Reunion, ity fiadiana ny amboara izay karakarain’ny seksiona Antananarivo Renivohitra ity.
Nilaza Ramandimbimanana Pierrot Delphin, filohan’ ny seksionina Antananarivo Renivohitra, fa tanjona amin’ ity hetsika ity, ny hampiakarana ny lentan’ny fifaninanana karate eto Madagasikara sy ny fahaizan’ireo Karateka malagasy. Tonga nanatrika ity hetsika goavana ity, ny filohan’ny Federasiona Karate-do Malagasy (FMK), Ratefinanahary Emile, sy ny lehiben’ny Federasionina Karate avy atsy Mayotte, Houzali Halima sy ny mpitantana ny Karate ao La Reunion, i Adolphe Pepin.
Samy nilaza ireo mpitantana ireo, fa hisy ny fiaraha-mientana amin’ny fampiroboroboana ny taranja Karate aty amin’ny faritra ranomasimbe Indianina. Mbola nanamafy an’izany koa ny lehiben’ny federasionina FMK, fa efa nankatoavin’ny Federasionina Frantsay, ny volana janoary teo ny fahafahan’i Mayotte sy la Reunion, mifaninana amin’ ny fifanintsanana tahaka izao.
Fitia Randria
Hatao eto Madagasikara ny fifaninanana Afrika Atsinanana
Hampiatrano ny fifaninanana Karate aty Afrika Atsinanana indray, ny malagasy. “Noho ny fahatokisan’ireo Federasionina iraisam-pirenena WKF sy ny Federasionina Afrikanina, UFAK, horaisin’i Madagasikara, ny volana desambra ho avy izao , indray ny fifanintsanana Karate aty amin’ny faritr’i Afrika Atsinanana”, hoy Ratefinanahary Emile, filohan’ny FMK.
French