Fihaonana an-tampon’ny Sadc : Folo ireo filoham-panjakana nanamafy ny fahatongavany

Efa manakaiky ny fotoana hanatanterahana ny fihaonana an-tampon’ny Sadc. Miisa folo ireo filoham-panjakana nanamafy ny fahatongavany hiatrika izany.

“Eo amin’ny 600 eony delegasionina ho tonga, ary folo ireo fi­loham-panjakana efa nanamafy ny hahatongavany. 17 ao­­gositra ny fivorian’ny filoham-panjakana, 15 aogositra dia efa ho tonga, ohatra, ny filohan’i Afrika Atsimo”. Io ny fanazavan’ny mpitondra tenin’ny filohan’ny Repoblika sady ta­len’ny fifandraisana eo anivon’ ny fiadidiana ny Repobli­ka, Ranoromaro Lova Hasini­ri­na, teny Anosy, omaly, ny amin’ny fandraisan’i Madaga­sikara ny fihaonana an-tampon’ny faha-45 eo anivon’ny vondrona Sadc. Hahazoan’ny vahoaka malagasy tombontsoa amin’ny fifandraisana ara-barotra izao fihaonana an-tampony izao. Eo koa ny fizahantany.
Zava-dehibe ary manan-tantara ho an’ny firenena izao fihaonana an-tampon’ny Sadc raisin’i Madagasikara izao. Sambany ny Malagasy no hi­tantana an’izany Sadc izany. Teo aloha, nitaraina taminy noho ny disadisa politika; amin’izao, handray ny fitantanana an’izany. Ny filohan’ny Re­poblika, Rajoelina Andry, no voasafidy hitantana izany ma­nomboka amin’ny 17 aogositra ho avy izao. Nisy ezaka lehibe ara-diplaomatika nataon’i Madagasikara nahatongavana amin’izany. Tokony ho re­harehan’ny firenena izany, fa izao i Madagasikara vao handray an’izany fihaonana an-tampon’ny Sadc izany ary hitantana izany ny filoha Rajoelina Andry. Mifampijery ary mijery ny haitarika sy izay azo raisina amin’ny isam-pirenena ireo firenena rehetra mivondrona ao anatin’ny Sadc.
Na izany aza, tsy nafeniny: mampalahelo fa nisy olon-dehibe teto amin’ny firenena nanao fandresen-dahatra nitety an’ireo firenena mpikamban’ny Sadc tsy hamonjy ny fi­haonana an-tampony eto Ma­da­gasikara ary aza atao eto izany. Eo koa ny hoe tsy mendrika hitantana ny Sadc ny filoha. Alahelo sa fialonana?

R. Nd.