Nampita hafatra mafonja ny filoha am-perinasan’ny FJKM, ny Dr Andriamahazosoa Irako Ammi, amin’izao synaoda faha-20 tanterahin’ny fiangonana any Taolagnaro izao.
Nambarany fa ampy izay ilay tanana zatra mangorona ho an’ny tena. Entanin’ny fitiavan-tena tsy mety voky, ka na mba manome aza; mizara anaty filan-dera hitsinjovana sahady ny mety ho fifidianana, araka ny nambarany. Mizara ny fampibabena trosa ara-tsaina ireo notolorana. Avy eo itakiana tambiny indray andro any. Tanana tsy mahay manolotra fa mamihina tsy mety hahafoy ary na manome aza, manome tsy amim-pifaliana, araka ny nambarany hatrany. “Mba hiova ho tanana vaovao hahay hitsotra ka hizara amim-pitiavana madiodio. Tia ny hafa tahaka ny tena, tsy misy ambadika, tsy misy takalo, tsy misy latsa”, hoy izy.
Mba hiova ho fahefana vaovao ho andrin’ny madinika sy ny mahantra, tsy mba mahitahita, tsy manan-kavana ambony, tsy manam-bola be ilay fahefana enti-manindry ny hafa, hanerena azy hanao zavatra mifanohitra amin’ny feon’ny fieritreretany. Hanitsakitsahana am-paladia ny fahamarinana, ka hitadiavana fanapotehana ireo tsy mitovy loko amin’ny tena. Eo koa ireo tsy manaiky baikoina hanao ny tsy rariny miaraka amin’ireo mpanambola hanaovan’ny sasany kopaka hisasahana, ka tsy mampaninona na hivarotana tanindrazana aza.
Nanteriny fa ilaina ny fahefana miandany amin’ireo olo-marina vonon-kijoro, ireo mahantra tsy misy mpiaro, ireo manana ny rariny verezin-jo. “Tsy azo ekena ny firaisana tsikombakomba amin’ny maizina. Hanaovana fatidra amin’ny satana, noho ny fitiavam-pahefana sy vola ary voninahitra ka hanaovana sorona na ny sarobidy indrindra aza”, hoy izy.
Synèse R.
French