Tontosa ny 14 ka hatramin’ ny 17 aogositra lasa teo ny fankalazana ny « Volambetohaka 2025 ». Notsiahivina tao anatin’ny telo andro tamin’izany io kolontsainan’ny Betsileo avaratra ao anatin’ny faritr’Amoron’i Mania io. Anisan’ny nandray anjara ireo distrika miisa efatra, ahitana an’Ambositra, Fandriana, Ambatofinandrahana ary Manandriana. Nanampy izany ny avy any Imady Ala.
Maherin’ny 1 600 ireo mpizaika nankalaza ity « Volambetohaka 2025 » ity. Anisan’ny natao tamin’izany ny Tsimandrimandry, diabe, dihy, fampisehoana taozavatra, velatsihy, zarahena, tsidika ny rovan’ Ambositra. Manampy izany ny dinidinika ho amin’ny fampandrosoana. Miisa valo ireo omby novonoina avy amin’ny ankolafy maro ka niarahan’ny mpizaika nihinana nandritra ny fotoana. “Tratra ny tanjona dia ny hampahalalana ny kolontsain’ny ao amin’ny faritr’ Amoron’i Mania”, hoy ireo nandaha-teny. Fanamby lehibe tafita ho an’ny governora, Rakotomandimby Désiré, sy ny préfet ao Ambositra, Razazaroanabavy Felanirina, anisan’ny kaomity mpanomana, izany.
Nodinihina ny hampivadiana ny kolontsaina sy ny asa tanana hizorana any amin’ny fandrosoan’Amoron’i Mania. Hikatroka hamoaka drafitra fampandrosoana ny fizahantany sy ny asa tanana izy ireo.
Synèse R.
French