Fahombiazana indray ny an’ny Malagasy niatrika ny fiadiana ny tompondakan’i Afrika, sokajy Jeunes sy Junior, natao tany Ghana, tamin’ity herinandro ity. Medaly 17 no azon’i Madagasikara.
Taranja mampamiratra ny Malagasy hatramin’izay ny fibatana fonjamby. Mbola noporofoin’ny Malagasy atltela izany nandritra ny fiadiana ny tompondakan’i Afrika, sokajy Jeunes sy Junior, natao tany Ghana, tamin’ity herinandro ity. Medaly 17 be izao no noraofin’izy ireo nandritra ity fifaninanana ity. Nahitana medaly volamena 6, volafotsy 9 ary alimo 2. Anisan’ny nisongadina Rakotonoely Tendry Mahay, izay nahazo medaly 6 ka volamena ny 1 ary volafotsy ny 5. Teo ihany koa Andriamitantsoa Tiavina Fabia sy Onjatiana Herman, izay samy nahazo medaly volamena 2 sy volafotsy 1 avy. Mbola namiratra ihany koa Randriamparany Chainah, izay nahazo medaly volamena 1 sy volafotsy 2. Randriamifidisoa Miranto, nahazo medaly alimo 2. Tsiahivina fa atleta vao misondrotra avokoa ireto nisolotena an’i Madagasikara tany Ghana ireto. Efa hita taratra sahady fa manana hoavy mamiratra izy ireo.
Nankasitrahin’ny WFA ny filoha Randriamanarivo Harinelina
Ankoatra ny vokatra tsara azon’ny Malagasy atleta, nahazo fankasitrahana avy amin’ ny WFA na ny Kaonfederasionina afrikanin’ny taranja fibatana fonjamby ihany koa ny filohan’ny federasionina malagasy, Randriamanarivo Harinelina Jean Alex. Notolorana “Honorariat” izy ny 17 aogositra lasa teo ho fankasitrahana ny zava-bitany amin’ny fampiroboroboana sy fampivoarana ity taranja ity.
Mi.Raz
French