Nitsidika ireo mpitondra sy manampahefana ao Nosy Be ny filohan’ny Antenimierandoholona, Ravalomanana Richard, omaly. Nisy ny dinidinika sy fifampizarana tamin’izany. « Efa vita ny fififidianana ka aoka atsahatra ny adilahy politika. Tokony himasoan’ny rehetra ny fampandrosoana ny tanàna », hoy izy. Nampahafantarina tamin’izany ny torolalana iadiana amin’ny fifindra-monina tsy ara-dalàna na avy any ivelany tonga eto an-toerana na ny samy ato anatiny. Nanterin’ny filohan’ity Andrimpanjakana ity fa tokony hamafisina ihany koa ny resaka fandriampahalemana. Tafiditra ao anatin’izany ny momba ireo mpizahatany tonga mitsidika eto amintsika, araka ny nambarany hatrany.
Etsy andaniny, nambaran’ ny loholona, Mino Seramila, koa fa tokony homena lanja ireo Malagasy mpandraharaha amin’ny sehatra ataony. Ny ben’ny Tanànan’i Nosy Be, Aly Aboudou, kosa nangataka ny hampiharana ny sata manokana ho an’ity kaominina ambonivohitra ity.
Ankoatra izay, nangataka fanazavana momba ny hetran-tany sy trano « Impôt foncier » nandraisan’ny fitondram-panjakana foibe fanapahan-kevitra ireo mpanolotsain’ny Tanàna. Teo koa ny fanamafisana ny ady amin’ny kolikoly. Manampy izany ny fijerena manokana ny hampandrosoana an’i Nosy Be.
Anisan’ny niatrika ny fihaonana tany an-toerana ireo olom-boafidy sy lehiben’ny sampandraharaham-panjakana.
Synèse R.
French