Manan-talenta, manana ny akora fototra ary misongadina maneran-tany, i Madagasikara eo amin’ny sehatry ny hainahandro. Anisan’ireo hasongadina ny sôkôla malagasy amin’ity andiany ity.
Raha resaka nahandro, miavaka ny Malagasy. Voaporofo hatrany izany, na eto an-tanindrazana ka hatrany amin’ireo hetsika lehibe maneran-tany ho an’ny hainahandro. Antony iray mbola mampitoetra ny lazan’ny «Salon de la gastronomie», izay hiditra amin’ny andiany faha-11 amin’ity taona ity izany. Nampahafantarina omaly, tetsy amin’ny foiben’ny Yas madagascar Andraharo, ny andinindinin’ny hetsika. Hotontosaina ny 25 hatramin’ny 27 septambra izao, ao amin’ny AFT Andavamamba izy ity. 3 andro ho an’ny hainahandro malagasy, fa hisokatra ihany koa ho an’ny fahaiza-manao vahiny eo amin’ity sehatra ity izany.
Hasongadina kokoa ny sôkôla, izay lohahevitra iompanan’ny karazana nahandro haroso mandritra ny hateloana. Manana ny sôkôla tsara indrindra maneran-tany rahateo eto Madagasikara.
Hiompana amin’izay ny andro faharoa, izay hanamarihina rahateo ny Andro iraisam-pirenena hoan’ny cacao. Arahina famelabelaran-kevitra izany, izay hoentin’i Helihanta Rajaonarison. Tsy misy tsy mahalala ny lazan’ny cacao malagasy, fa manao ahoana ny vokatra voahodina? Anisan’ireo horesahina ao izany. Hizara ny traikefany amin’ny sehatra i Henintsoa Moretti, matihanina amin’ny hainahandro eto sy any ivelany, nanangana ny Haka Fy Authentic Restaurant.
Mpitsidika manodidina ny 5 000 eo no andrasan’ny mpikarakara, raha ny fanazavana, omaly. Hifarimbona hanatanteraka izany ny Yas Madagascar, ny Organisation internationale de la Francophonie ary ny komity mpikararaka, mba hanomezana sehatra ny hainahandro amin’ny maha kolontsaina iraisam-pirenena azy.
Zo ny Aina
French