Manoloana ny raharaham-pirenena amin’ izao fotoana, namoaka fanambarana iombonana ireo fikambanana, antoko politika, olom-pirenena tsora sy ireo Malagasy mila ravinahitra any Eoropa mivondron ao amin’ny Diamar, omaly, tany Paris. Voalazan’izy ireo amin’izany fa tsy fitakiana tsotra momba ny fahatapahan-jiro sy rano no voizina’ny mpanohitra amin’ izao fa fikasana hanozongozona fanjakana sy ny andrimpanjakana mijoro ara-dalàna. Araka ny ambarany ao anaty fanambarana, nirona mankany amin’ny fampiadiana ny samy Malagasy ny tanjon’ireo mpanao politika tsy mankasitraka ny fitondrana. Eo koa ny filazany fa tsy mahafehy ny fanehoan-kevitra amin’ny tambajotran-tserasera ny sasany ka lasa mihantsy ady sy mampirisika ho any amin’ny fanapotehana ny tanindrazana.
Manoloana izany, mampirisika ny filoham-pirenena, Rajoelina Andry, hatrany amin’ ny fametrahana vahaolana maharitra amin’ny filan’ny vahoaka ny Diamar. Manohana azy ihany koa amin’ny paikady ho fampandrosoana ny firenena. Melohin’izy ireo ny fikasan’ny mpanao politika sasany hanao hetsika izay tsy mifanaraka amin’ny soatoavina malagasy sy ny sata repoblikanina. Manentana ny vahoaka malagasy izy ireo, araka izany, mba hahay handanjalanja ny teny avoaka anaty tambajotran-tserasera. Mba tsy handairan’ny tsaho iniana aely hanakorontanana fiarahamonina ihany koa. Ny fitoniana amin’ny endriny rehetra sy ny filaminana no ahitana vahaolana maharitra, hoy ihany ny fanambaran’ny Diamar. Izay ihany no vahaolana maharitra hiadiana amin’ny fahantrana sy hirosoana any amin’ny fampandrosoana ny firenena, araka ny nambaran’ izy ireo.
Randria
French