Ny 27 septambra no tokony ho nanatontosana ny seho. Noho ny zava-nisy teto amin’ ny firenena, nahemotra amin’ ny 25 oktobra, amin’ny 10 ora maraina ao amin’ny Restaurant Ny Railovy Andohan’Analakely ilay fihaonan’i Salomon amin’ny mpitia zavakanto.
Hihira ireo hira nahafantarana azy i Salomon. Hanakoako sy hitondra tamberina sy tsiahy, ny hiran’ireo mpamorona sangany nampihira azy. Anisan’ireny ry Ramaroson Wilson, Rivo Ramandiamanana, Naly Rakotofiringa, Bessa, Nelson Lalao, Rolland Raelison, sy ny maro hafa …
Hampiavaka ity fampisehoana ity ny fampiaraham-peon’i Salomon amin’ireo mpankafy na mpitia zavakanto ho avy eny an-toerana, amin’io fotoana io. Nanome toky ity mpanakanto manana traikefa matanjaka ity fa hanana endrika miavaka ity seho ity. Iray amin’izany, tsy voatery ho ireo zoky amin’ny taona ihany no hampiara-peo aminy fa izay rehetra efa nanana izany faniriana izany hatry ny ela sy izay hentanin’ny aingam-panahy mandritra ity fihaonana sy fampisehoana rindrankira an-tsehatra ity.
Raha tsiahiviny, iray amin’ireo nandrafitra ny Kintana Telo niaraka tamin’i Gabhy sy Romule i Salomon. Manana feo avo sy matanjaka fatratra izy. Ankoatra io feo io, anisan’ ny mampiavaka azy ilay fahaiza-mamoaka ny aingam-panahiny hifanaraka tsara amin’ izay namoronana ilay hira. Fihetsika sy fomba fihira tsy maka sarotra, kanefa, manana akony matanjaka be any amin’ izay maheno ny feony.
HaRy Razafindrakoto
French