Anisan’ireo nihaona tamin’ireo delegasionin’ny Sadc mandalo eto amintsika ny eo anivon’ny HCC. Nivoitra tamin’ny fihaonana, tetsy Ambohidahy, ny resaka manodidina ny Lalàmpanorenana. « Vahaolana namahana ny krizy teto amin’ny firenena ny HCC. Tafiditra ao anatin’ny Lalàmpanorenana avokoa ary voahaja ireo fanapahan-kevitra rehetra noraisina », hoy ny filohan’ity Andrimpanjakana ity, Rakotoarisoa Florent, namintina ny dinika, tetsy Ambohidahy. Nanambara kosa ireo eo anivon’ny Sadc fa tsy tonga hitsara ny toe-draharaham-pirenena izy ireo. « Manao tombana sy mijery ifotony ny tranga niseho teto izahay ary hanao tatitra izany any amin’ny foiben’ny Sadc », hoy izy ireo.
Anisan’ny nandray ireo delegasionin’ny Sadc teny Faravohitra ny filoha teo aloha, Ravalomanana Marc. Niatrika izany koa ireo mpikambana eo anivon’ny Troika. Nambaran’ny filoha nasionalin’ny Tim ny tranga teto amin’ny firenena. Tsiahivina fa tafiditra amin’ny fakan-kevitra tanterahin’ny Sadc izao fihaonana izao. Tahaka izany koa ireo eo anivon’ny mpomba ny fitondrana, nahitana ireo depiote sy minisitra Irmar. Nandray ireto delegasionina ireto teny amin’ny Arena Ivandry izy ireo, omaly.
Hitohy anio, amin’ny fandraisan’ny FFKM azy ireo, eny Andohalo, izao dian’izy ireo izao. Ny fihaonana amin’ny Gen Z sy ny Tafika ary ireo masoivoho vahiny eto amintsika.
Tsiahivina fa mitarika azy ireo ny sekretera voalohany misahana ny lafiny lalàna sady minisitry ny Raharaham-bahiny avy any Malawi. Miompana amin’ny lafiny teknika izao iraka tanterahin’izy ireo izao hanamarinana ny zava-nisy teto. Niainga tamin’ny fanapahan-kevitry ny fihaonana an-tampony tsy ara-potoanan’ny Troïka, eo anivon’ny Sadc, ny 16 oktobra teo izao iraka izao.
Synèse R.
French