Anisan’ny nisongadina tamin’ny filankevitry ny minisitra, afakomaly, teny Iavoloha, ny toromarika avy amin’ny filoham-panjakana, ny Kly Randrianirina Michaël. Anisan’izany ny fitantanan-draharaham-panjakana.
«Tokony hanaovana ezaka ny handikana amin’ny teny malagasy ny taratasim-pifandraisan’ny fanjakana amin’ireo mila raharaha rehetra momba izany», hoy izy. Nampahafantatra koa ny eo anivon’ny fiadidiana ny Fanavaozana ny Repoblika fa misy olona milaza ho iraky ny filoham-panjakana mandeha eny anivon’ny minisitera sy ny sampandraharaham-panjakana, manome baiko sy manery ireo tomponandraikitra. « Entanina isika mba hitandrina amin’izany fihetsika miendrika fisolokiana izany ka hitakiana hatrany ny fanamarinana mifanaraka amin’ny iraka atao », hoy ihany izy. Etsy andaniny, naaton’ny fitondram-panjakana ny fanavaozana isan-taona ny lisi-pifidianana (Rale), araka ny fampitana am-bava, nataon’ny minisiteran’ny Atitany sy ny fitsinjaram-pahefana. Tokony hanomboka ny 1 desambra izao anefa izany.
Maromaro koa ireo fanafoanana fanendrena masoivoho sy solontena ara-diplaomatika any ivelany. Anisan’izany ny nanesorana ny ambasadaoron’i Chine, Robinson Jean Louis. Tahaka izany koa ny solontenan’i Madasikara any amin’ny Unesco, Frantsa, i Yvette Sylla sy ny any Soisa ary ny eo anivon’ny Firenena mikambana any Geneve. Nesorina amin’ny toerany koa ny masoivoho sy ny solontena any Maraoka.
Ho andro tsy iasana ny « Taom-baovao Malagasy »
Ankoatra izany, voatendry ho talen’ny birao misahana ny fitarainana eo anivon’ny fiadidiana ny Fanavaozana ny Repoblika, ny Kly Rakotomamonjy Patrick. Voatendry ho tale jeneralin’ny famerenana ny fananana amin’ny fomba tsy ara-dalàna (Arai), Andrianjatovo Rado Anjaranirina.
Nankatoavina tamin’ny filankevitry ny minisitra ny asa efa natao momba ny fankatoavana ny daty tokana hanamarihana ny «Taom-baovao Malagasy» mba ho andro tsy iasana nefa andraisan-karama.
Synèse R.
French