Vahiny manokan’ny « Madagascar Festival », amin’ity andiany faha-16 ity, i Nico K. Tonga omaly ity poeta, mpanao slam, mpanao rap frantsay ity, izay fanta-daza amin’ ny filalaovany ny teny. Nisokatra omaly mantsy ilay « Expoétique », etsy amin’ny IFM Analakely. Fampirantiana tsy mitovy amin’izay fahita fa anambaran’i Nico K ny fifandraisan’ny lahatsoratra sy ny sary amin’ny endriny maro, ka mamerina any amin’ireo mpitsidika ny fandraisany ny hafatra amin’ny sanganasa tsirairay. Mpilalao zavakanto marolafy ity vahiny ity, ka hainy ny misintona ny tsirairay handray araka izay tandrify azy ny herin’ny soratra, amin’ny alalan’ ny kisary voafantina. Mbola manana hatramin’ny 24 janoary izao ireo liana amin’ny hetsika « Expoétique ».
Satria ny hizara no tena anton-diany, hanolotra an-tsehatra ny « 100% Impro » ihany koa izy, ny zoma izao, ao amin’ ny efitranon’ny IFM Analakely ihany. Tsy misy fanomanana fa izay aingam-panahy mivoaka, arakaraka ny lohahevitra safidiana sy miserana atolotry ny mpijery rehetra eo no hamohan’ity mpanakanto ity ny sehony. Hanaingo ny kilalaon-teny entin’i Nico K., mandritra izany, i Njaka Rakotonirainy, mpitendry piano fanta-daza amin’ny talentany. Mialoha izay, haneho ny sanganasany, nahazoany ny anaram-boninahitra tompondaka 2024 tamin’ny slam, i Orad.
Ny sabotsy 6 desambra izao ny tena resadresaka mivantana amin’i Nico K. Hizara ny fijeriny ny slam maneran-tany, hanome torohevitra raha ilaina, fa indrindra hanentana ireo mpisehatra mba hitozo ka hikaroka ny lalana mankany amin’ny fahombiazana. Afaka hivelarana eo amin’ny sehatra iraisam-pirenena mantsy ny slam, indrindra fa saika milalao ny teny frantsay avokoa ireo mpisehatra eto Madagasikara. Hanotrona ny famaranan’ny fifaninanam-pirenena slam ihany koa i Nico K. ny alin’io sabotsy io ihany, ka afaka manome torohevitra sahady ho an’izay hisolo tena an’i Madagasikara any amin’ ny fifaninanana izay ho tompondaka maneran-tany.
Zo ny Aina
French