Hanolotra volavolan-dalàna ho fanandratana ny vokatra mampiavaka ny faritra tsirairay avy ny minisiteran’ny Fampiroboroboana ny indostria sy ny fampivelarana ny sehatra tsy miankina (MIDSP) ho fiarovana izany. Tetikasa iarahany amin’ny Omapi, rantsamangaika misahana ny fizaka-manana ara-indostria. Tafiditra ao anatin’izany ny vokatry ny fambolena, ny asa tanana ary ny vokatra voahodina. Tanjona ny hanomezan-danja ny vokatry ny faritra iray sy hanomezana vahana ny sandany eto Madagasikara sy eo amin’ny sehatra iraisam-pirenena. Hisongadina ao anatin’ny tetikasa ny dipoavatra mena an’i Bongolava, ny kafe arabica an’Itasy, ny cacao an’Ambanja, ny vary manitra avy ao Anivorano avaratra sy ny maro hafa. Fanoitra stratejika ho an’ny faritra sy ho fampandrosoana ny toekarena ny hetsika atao. Araka izany, hanampy betsaka amin’ny fanondroana ara-jeografia ny vokatra iray ny tetikasa. Ankoatra izay, tsy ampy ny tolotra raha oharina amin’ny tinady ny dipoavatra mena avy ao amin’ny faritr’i Bongolava. Tsiahivina fa nisy ny tetikasa nataon’ny fitondram-panjakana ny volana avrily teo, tany Ankadinondry Sakay. Natao ho fampitomboana ny vokatra, hahafahana mamaly ny filana eto an-toerana sy ivelan’ny faritra izany.
Henintsoa
French