Nivahiny 24 ora tany Dubaï, ny 9 desambra lasa teo, ary nitodi-doha teto an-tanindrazana, ny 10 desambra alina, ny filoham-panjakana, ny Kly Randrianirina Michaël. Fihaonana maromaro no nataony tamin’izany, araka ny nambaran’ny gazety Africa Intelligence.
Anisan’ny nihaona taminy ireo diplaomaty any Emirats arabo mitambatra, toy ny Sekreteram-panjakana misahana ny fifandraisana iraisam-pirenena, Reem bint Ebrahim Al Hashimy. Niompana tamin’ny resaka angovo sy ny rano no vontoatin-dresaka teo amin’ny roa tonta. Noraisin’ilay mpanefoefo Amerikanina, Erik Prince, koa ny Filoham-panjakana. Anisan’ny niompanan’ny dinika ny momba ny angovo sy rano ary ny ny lafiny toekarena. Maniry ny hampiasa vola aty amin’ny kaontinanta afrikanina ity mpandraharaha ity amin’ny alalan’ny orinasany Freedom First. Voalaza fa anisan’ny tanan-kavanan’ny filoha Amerikanina, Donald Trump, izy io ary manana fifandraisana amin’ireo firenen-dehibe hafa. Voaresaka koa ny momba ny fiarovana sy filaminana « Cybersécurité ».
Nambaran’ny gazety Africa Intelligence, fa tsy nanisy resaka ny momba ny filoha teo aloha, Rajoelina Andry, mialokalona any Dubaï ny filoham-panjakana, ny Kly Randrianirina Michaël, tamin’izao diany tany an-toerana izao.
Mila vavaka sy fahendrena
Nihazo avy hatrany any amin’ny Toby Ankaramalaza ny Filoha rehefa tafaverina an-tanindrazana. Nambarany nanoloana ireo mpino fa tsy mora ny adidy napetraka taminy. « Antony hiverenako eto amin’ity toerana Masina ity izany. Tsy vitan’ny herin’olombelona irery ny fitantanana ny firenena. Mila vavaka, fahendrena ary fitarihan’Andriamanitra izany », hoy izy. Nankasitraka sy nangataka ny vavak’ireo mpiandry sy ny raiamandreny ary ny fiangonana mba hanampy amin’ny hahatanteraka ny andraikitra natolotry ny vahoaka azy ny filoham-panjakana tamin’izany. Tsiahivina fa notokanana ho mpiandry tao Ankaramalaza, ny 2 aogositra 2023, ny tenany ary nanomboka teo ny antso sy ny adidy ara-panahy, nialoha ny nitondrany andraikitra lehibe eto amin’ny firenena.
Synèse R.
French