Nahazo ny anjarany ny mpanao hiragasy. Miara-dalana amin’izy ireo ihany koa ny vovonan’ny mpanao hira sy dihy vakodrazana, izay hasongadina ny alatsinainy izao.
Mamerina, mamelona ary mampahafantatra. Andraikitra lehibe sahanin’ireo mpanakanto mpivoy ny hira sy dihy vakodrazana ireo. Antom-pisian’ny Vovonan’ny mpanao vakodrazana, ihany koa izany mba hanomezan-danja ny talentan’ireto mpitahiry ny soatoavina sy kolontsaina ireto. Ho fanamafisana izany, hisy ny hetsika lehibe hanasongadinana ny hira sy dihy vakodrazana, ny talata 23 desambra izao, manomboka amin’ny 8 ora sy sasany maraina, ao amin’ny Ivokolo Analakely.
Seho matihanina
Tarika matihanina maro anatin’ny vovonana no hifandimby an-tsehatra mandritra ny seho. Misy amin’ireo ny efa andrarezina, nampita ny afo tsy maty tamin’ireo taranaka. Maro koa ny vato nasondrotry ny tany, mamelo-maso sy manohy ny zavakanto. Tsy hira sy dihy ihany, fa homena sehatra, mandritra izany ihany koa, ny fitafy fitondra an-tsehatra sy rehefa milanona, anatina filatroana. Eo koa ny taovolon’ny Ntaolo, izay nifandovana an-taonany maro.
« Ny dihy vakodrazana sy ny tontolony eto Madagasikara sy eo amin’ny sehatra iraisam-pirenena », « Ny toeran’ny zavakanto sy ny kolontsaina eo amin’ny fanabeazana sy ny fampandrosoana maharitra » ary « Ny fiaraha-miombon’antoka amin’ny fampiroboroboana ny fameloma-maso ny fiarovana ary ny fampitana ny vakodrazana malagasy ». Ireo telo ireo kosa ny lohahevitra iompanan’ny fampirantian-kevitra, izay heverina fa hampanan-karena ny hetsika. Entanina manokana ireo mpianatra, ireo mpanabe ary ireo mpankafy ny zavakanto rehetra handray anjara, satria maimaimpoana izany.
Zo ny Aina
French