Nampahafantarina, omaly ireo mpikambana eo anivon’ny governemantan’ny Praiminisitra, Rajaonarison Mamitiana. Miisa 13 ireo mpikambana vaovao raha 17 kosa ireo tafajanona amin’ny toerany.
Anisan’ireo minisitra vaovao ny misahana ny Raharaham-bahiny, Alice N’Diaye. Efa nisahana andraikitra teo anivon’ny minisitera ihany ny tenany, nialoha ny fanendrena. Minisitra vaovao misahana ny Fampianarana teknika sy ny fanofanana arakasa, ny depiote, Andriamampandry Todisoa. Minisitry ny Fanabeazam-pirenena, Rajaonarison Sendranirina.
Natao minisitera manokana kosa ny Fambolena, miaraka amin’ny fahavitan-tena ara-tsakafo ka voatendry hisahana izany, Ramino Gaetan. Hisahana ny minisiteran’ny Fiompiana, ny minisitra, Andrianomenjanahary Riana. Minisitry ny Fampiroboroboana ny indostria sy ny fampivelarana ny Sehatra tsy Miankina, Raharimanjatovo Rina Nampoina. Misahana ny minisitry ny Asa sy ny asam-panjakana, Denis Franconion Mac. Minisitry ny Fitaterana sy ny famantarana ny toetr’andro, Andrianavalona Ramanambola Herizo. Minisitry ny Angovo sy ny akoranafo, Radonirina Lucas Rabearimanga. Hisahana ny minisiteran’ny Asa vaventy, Rafefimanana Richard. Minisitry ny Jono sy ny toekarena manga, Maharavo Jean. Minisitry ny Tontolo iainana sy ny fampandrosoana lovain-jafy, Andriantsiala Luc Aristide. Minisitry ny Mponina sy ny firaisankina kosa, Rakotoniaina Cathia Voahanginirina. Efa nitana andraikitra ara-bola teo anivon’ny fiadidiana ny Fanavaozana ny Repoblika ny tenany.
Miala avy hatrany
Anisan’ny hafatry ny filoham-panjakana nanoloana ireo mpikambana amin’ny governemanta rehetra ny tsy fanekena ny tsy fahombiazana sy ny kolikoly. «Miala avy hatrany! Tsy governemanta ho an’ny tombontsoa manokana ity na ho an’ ny ankolafin-kery fa ho an’ny tombontsoan’ny vahoaka », hoy izy. Natsidiny ny hanohizana ny efa nataon’ny teo aloha sy ny fanokafana ny sehatra ho an’ny rehetra, indrindra ireo miantoka ny filan’ny mponina andavanandro.
Sivy amin’ny 30 no vehivavy
Miisa 17 kosa ireo mbola tafajanona amin’ny toerana. Anisan’izany Razafimanantsoa Hanitra. Niova ho minisitry ny Fanavaozana izany raha minisi-panjakana teo aloha. Mbola voatana amin’ny toerany ny minisitry ny Foloalindahy, ny Jly Razafitombo Maminirina, ny minisitry ny Fitsarana, Fanirisoa Ernaivo. Ny minisitry ny Atitany, Rakotonandrasana Hanitra Velonjara. Ny minisitry ny Toekarena sy ny fitantanam-bola, Ramiarisona Herinjatovo. Ny minisitry ny Filaminam-bahoaka, Eric Michel. Minisitry ny Fanajariana ny tany sy ny fananan-tany, ny Jly Lylison Rene de Roland. Ny minisitry ny Fahasalamana, Magnana Monira. Minisitry ny Fampianarana ambony sy ny fikarohana momba ny siansa, ny Pr Ravonimanantsoa Manda-Vy. Minisitry ny Varotra sy ny fanjifana, Andriamadison Haingotiana Michela Angèle. Minisitry ny Harena an-kibon’ny tany sy ny loharanon-karena stratejika, Andriamparany Carl. Minisitry ny Fizahantany sy ny asa-tanana, Vololoniaina Lucie. Minisitry ny Fampiroboroboana ny Haitao Ara-kajy Mirindra, ny Paositra sy ny Fifandraisan-davitra, Andriamampiadana Mahefa. Anisan’ireo mbola voatazona amin’ny toerany koa ny minisitry ny Tanora sy ny fanatanjahantena, Rasambany Alain Desiré. Tahaka izany koa ny minisitry ny Serasera sy ny kolontsaina, Gascar Fenosoa. Mbola tafaverina amin’ny toerany koa ny minisitra delege, misahana ny zandarimariam-pirenena, ny Jly Bama Marima.
Maromaro ireo minisitra nisaorana
Anisan’ny nisaorana tsy tafaverina intsony kosa, ny minisitry ny Raharam-bahiny
teo aloha, Razanamahasoa Christine, ny minisitry ny Fanabezam-pirenena, Hanitriniaina Karena. Eo koa ny minisitry ny Asa sy ny asam-panjakana, Florent Soatiana Betty Leone ; ny minisitry ny Mponina teo aloha, Raharinirina Sidonie. Ny minisitry ny Angovo sy akoranafo teo aloha, Ralitera Ny Ando. Tsy voantendry intsony koa ny minisitry ny Asa vaventy, Razafindrianarivo Henri Jacob.
Synèse R.
French