Noraisina tamin’ny fomba ofisialy omaly, ny fitaovam-piadiana avy amin’ny Rosianina. Notanterahina teny amin’ny toby jeneraly Mounibou Ismaël eny Ivato, ny lanonana mifandraika amin’izany.
Tafiditra ao anatin’izany koa ireo fanampiana samihafa. Manamafy ny fiaraha-miasa eo amin’ny firenena roa tonta izany famatsiana fitaovam-piadiana sy fanomezana fanampiana izany, taorian’ny fihaonan’ny filohan’ny Fanavaozana ny Repoblikan’i Madagasikara tamin’ny ny filoha rosianina, Vladimir Poutin, farany teo. Tonga nanome voninahitra ny fandraisana ireo fitaovana sy fanampiana ny filohan’ny Fanavaozana, ny kolonely Randrianirina Michaël.
“Tombontsoa lehibe ho an’ny foloalindahy malagasy ny mahazo ireo harena ireo”, hoy ny minisitry ny Fiarovam-pirenena, ny jeneraly Razafitombo Maminirina Ely. Mba hanamafisana ny fiarovana ny sisintany sy hampanjakana ny fandriampahalemana anatiny eto Madagasikara izany.
Fifampizarana traikefa ara-miaramila
Anisan’ny fanomezana tamin’izany, ohatra, ny karazam-bala, fanamia-miaramila… Nasiany teny manokana ihany koa fa mbola mitohy hatrany ny fiaraha-miasa ara-tafika eo amin’i Madagasikara sy i Rosia. Toy izany, ohatra, ny fifampizarana fahaiza-manao sy traikefa eo amin’ny miaramila rosianina sy malagasy. Ankoatra izany, hisy koa ny fiofanana ho an’ireo tomponandraiki-panjakana ambony amin’ny fiarovana, ka misy ny hatao eto Madagasikara, misy any Rosia.
R. Nd.
French