Hatao ny 9 sy 10 avrily ho avy izao, eny amin’ny Novotel Ivandry, ny fihaonambe ara-toekarena CEO Summit, karakarain’ny Becom sy ny Sendikan’ny indostria eto Madagasikara (Sim). Lohahevitra noraisina ny hoe, « foto-kevitra vaovao, vina vaovao, sahia mikaroka zava-baovao ho an’ny hoavy ». Fotoana hihaonan’ny mpisehatra ara-toekarena samihafa, ahitana mpitarika, ny mpanapa-kevitra, ny mpampiasa vola, ny orinasa tsy miankina. Tanjona ny hampifandray ny vina hampiroboroboana ny toekarena
aty amin’ny ranomasimbe Indiana. Maherin’ny 650 ny mpandray anjara, mihoatra ny 250 ny orinasa sy fikambanana ho hita mandritra ireo fotoana ireo. Mahatratra 20 ny atrikasa stratejika, hifanakalozan-kevitra sy hanaporofoana fa manana ny lanjany sady vovonana ara-toekarena ny CEO Summit.
Miisa 20 ny firenena ho avy, avy atsy Afrika, Eoropa, Arabo (Moyen-Orient) ary indrindra ny aty amin’ny ranomasimbe Indiana. Maherin’ny 100 ireo hanao famelabelaran-kevitra, ahitana mpitantana orinasa, mpampiasa vola, tomponandraikim-panjakana ary manampahaizana iraisam-pirenena. Nambaran-dRakotomalala Tantely, tomponandraikitry ny Becom, fa « hitondra fijery ara-toekarena vaovao izany, ahafahana mametraka vina iombonana, eo amin’ny fampiasam-bola, ny fiaraha-miasa ary ny fampandrosoana ».
« Agri-business »
Ho an’ny filohan’ny Sim, Rasamimanana Tiana, « endrika iray natao hampahafantarana aty amin’ny ranomasimbe Indiana sy izao tontolo izao, fa manana ny lanjany ara-toekarena i Madagasikara ary azo hiaraha-miasa sy hiombonana antoka ».
Voakasik’ity CEO Summit ity avokoa ny seha-pihariana rehetra. Fa ny tena hasongadina ihany koa dia ny lafiny « agri-business », fandraharahana amin’ny famokarana mitodika amin’ny tsena. Mpiara-miombon’antoka ofisialy ny Africa Dubai, banky ofisialy ny Bredd + Madagasikara.
Njaka Andriantefiarinesy
French