Omena sehatra ny rehetra. Tranga tsy fahita firy eo amin’ny tontolon’ny fiantsana tononkalo ny fanomezana sehatra hisokatra ho an’ny rehetra. « Rakotr’ainga, rakitr’ ainga », na ilay antsa malalaka hotanterahina anio, manomboka amin’ny 2 ora sy sasany, ao amin’ny efitrano Dox, tranombokim-pirenena Anosy. Entanin’ny Faribolana Sandratra manokana ireo tanora te haneho ny talentany. Ny fotoana tahaka izao, rahateo, no iray amin’ireo hametrahan’izy ireny ny fangitra ahafahany mandrefy ny ezaka mbola hataony.
Fiverenana eny an-doharano mampitaintaina. Ireo manana ny ambilombazan’ny fahalalana momba ny raokandro, mitonona avy hatrany fa mpitsabo. Ireo mahita rirany amin’ny lafin-tany sy ny vintana, mirehaka ho mpanandro. Ireo mitafy lamba eny an-danonana, miebo fa izy ihany no mahafantatra ny momba ny kolontsaina malagasy… Tranga anisan’ny mampanahy fatratra, satria, ilay fahalalana kely dia kely fa ny anaram-boninahitra manaka-danitra.
Tsy mitsaha-midina ny fahalalan’ny Malagasy eo amin’ny tontolon’ny kolontsaina. Ny mahafantatra, tsy maneho ny heviny. Ireo tsy mahay, mitompo teny fantatra… Hany ka mibirioka any amin’ny tsy izy ny « zavatra ». Tononkira tsy misy fotony (fototra) nanjary tsy afaka eny am-bavan’ny Malagasy. Dihy mamoafady, ankatoavin’ny fiarahamonina ka omeny laka… Matetika aza, ireo miteny sy manitsy indray no mahazo tsiny.
French