Nitokana ny masoivohon’ny Banky foiben’i Madagasikara, ao Antsirabe, afakomaly, ao anatin’ny fankalazana ny faha-100 taonan’ny vola malagasy ny filohan’ny Fanavaozana ny Repoblika, ny Kly Randrianirina Michaël. Voaresany ny fanakaikezana kokoa ny vahoaka.
“Anisan’ny vaindohan-draharahan’ny Fanavaozana ny fitsinjaram-pahefana sy ny fametrahana ny sampandraharaham-panjakana eny ifotony hanakaiky vahoaka.” Io ny kabarin’ny filohan’ny Fanavaozana, ny kolonely Randrianirina Michaël, tamin’izany. Hanamaivana ireo manan-draharaha izany, indrindra hanafaingana ny ny raharaham-panjakana.
Manana andraikitra eo amin’ny fifandraisana ara-toekarena anatiny sy iraisam-pirenena ny Banky foibe. Izay no maha tsy azo ihodivirana azy eo amin’ny toekarena. Eo ny famehezana ny fiakaran’ny vidim-piainana, ny fitantanana ny politika fanakalozam-bola amin’ny fiarovana ny lanjam-bola. Eo koa ny famoaham-bola, ny fitahirizana ny volam-panjakana sy ny fanohanana ny politika ara-toekarena ankapoben’ny governemanta, ny fiarovana ny fahaleovantena hanamafisana ny tahirim-bola vahiny, ny fiatrehana ny fampandehanan-draharaha mifameno amin’ny asan’ny fanjakana.
Niakatra ny lanjan’ny Ariary
Tao anatin’ny herinandro maro izay, miakatra ny lanjan’ny Ariary. Irariana ny hitohizan’izany. Fanamby miandry ao anatin’izao savorovoro maneran-tany izao ny fanomanana ny enti-manana eo amin’ny fifandraisana amin’ny any ivelany, enti-miatrika ireo sedra mety hitranga.
Nitokana ny tobin’ny Vondron-kery manokana hery vonjy taitra (GFSI) tao Arivonimamo izy. Teo koa ny fanomezana mari-pankasitrahana “brevet” hery manokana “Ampinga” ho an’ireo miaramila vita fiofanana, ny fanolorana ambany faneva ireo hanao fanompoam-pirenena. Hatsangana any amin’ny faritra mena ny toby toy izany, ka ny fiadidiana ny Fanavaozana no hiantoka. Hakarina avo roa heny ny sakafon’ny miaramila (PGA), 11 000Ar manomboka izao.
R. Nd.
French