Mihenjana manoloana ny fitondran-tenan’ny diplaomaty sasany eto Madagasikara ny fitondran’ny Fanavaozana. Nampanantsoina teny Anosy ny ambasadaoro frantsay, Arnaud Guillois, omaly.
Voaantso teny amin’ny minisiteran’ny Raharaham-bahiny ny ambasadaoron’ny Repoblika frantsay, Sem Arnaud Guillois, omaly, araka ny fanambarana nampitain’ny eo anivon’ny minisiteran’ny Raharaham-bahiny. Nampahafantarina ny ambasadaoro nandritra ny fihaonana, tamin’izany, ny fanapahan-kevitry ny governemantan’ny Fanavaozana ny momba ny mpiasa iray eo anivon’ny masoivoho frantsay eto Antananarivo. Tsy sitraky ny fitondram-panjakana (“persona non grata”) izy.
Nohamafisin’ny minisitera fa anton’izany ny fihetsika heverina fa tsy mifanaraka amin’ny sata ananany. Nisy ny fanadihadiana nataon’ny manampahefana isan-tsokajiny eto an-toerana. Nivoitra taorian’izany ny mahakasika ny asa fanakorontanana, izay nahatafidirana olom-pirenena malagasy sy vahiny, araka ny fanambarana.
Matotra
Matotra ny fiaraha-miasa eo amin’ny firenena roa tonta, saingy manantitrantitra ny minisiteran’ny Raharaham-bahiny fa manamafy hatrany ny firaiketan’ny governemantan’ny Fanavaozana amin’ny fanajana ireo foto-kevitra mifehy ny fifandraisana diplaomatika eo amin’ny sehatra iraisam-pirenena. Izany dia araka ny Fifanarahana natao tany Vienne, tamin’ny taona 1961. Mitazona mandrakariva ny fifandraisana marim-pototra, miorina amin’ny fifampitokisana sy ny fanajana ny fiandrianam-pirenena, i Madagasikara.
Araka izany, andrasana ny fanapahan-kevitry ny eo anivon’ny ambasady frantsay eto Antananarivo. Andrasana koa ny fampodiana any Frantsa izay mpiasa ao aminy tsy sitraky ny fitondram-panjakana malagasy izay.
R. Nd.
French