Naneho ny heviny manoloana ny raharaham-pirenena ny filohan’ny antoko Otrikafo, Rabevahiny Elia. Hentitra ny teniny. « Hadisoana lehibe ny tsy nandraisana fanapahan-kevitra nandravana ireo Andrimpanjakana tsy nahomby, notakina teny an-kianja », hoy ity mpitarika ny KFIM ity.
Nanatanteraka famorana faobe tao Ankadinandriana ny Malagasy miara-miainga, omaly. Mpitsabo mpikambana ao anatin’ny antoko ihany no misahana izany. Tonga maro nitondra ny zanany ireo ray aman-dreny avy amin’ireo fokontany miisa 18. Marihina fa efa fanaon’ny antoko isan-taona ity hetsika sosialy ity.
Nambaran-dRazafiarison Laza fa tsy fitakiana fanavaozana no notakina teny an-kianja fa fanovana rafitra. Nohitsiny fa miverina amin’ny voalazan’ny antokony, RCR, avokoa ny zava-misy eto amin’ny firenena. « Tsy manaraka Lalàmpanorenana isika ankehitriny ary ny HCC ihany no manitsakitsaka izany », hoy izy.
Miantso ny hampanjakana ny fahamarinana sy ny rariny ny depiote Rajerison Antoine. Nambarany fa vonona hatrany ho amin’ny fiarovana ny vahoaka ny tenany. « Anisan’ny fitaovana fampanginana ireo nijoro niteny ireo tsy nety teto amin’ny firenena, hatramin’izay, ny fitsarana sy ny mpitandro filaminana ka aoka hahay haka lesona isika », hoy izy.
French