Hotanterahina ao amin’ny Kianja Mitafo Mahamasina, ny 4 jolay ho avy izao, ny fifaninanana ara-batana “Circuit Training à Madagascar”, andiany voalohany.
Hetsika ara-panatanjahantena karakarain’ny Zaka Rise Mada, tohanan’ny orinasa Yas Madagascar. Hotolorana vola 2 tapitrisa Ariary izay mahazo ny laharana voalohany amin’izany, raha ny fanazavan’ny tomponandraikitra omaly, teny Andraharo. Natokana ho an’ireo olona maherin’ny 18 taona, lahy sy vavy, ary tomombana tsara ara-pahasalamany ity lalao ity. Raha ny filazan’izy ireo, ny ora sy minitra no hiasa mandritra ny lalao. “Izay mahavita ireo sokajin-dalao toy ny pompe, squats, corde à sauter, jump box, burpees, sprint, voalohany no mivoaka ho mpandresy, isaky ny dingan’ny fifanintsanana. Tsy misy kosa ny jump box ho an’ny vehivavy”, hoy ny Tomponandraikitra ao amin’ny Zaka Rise Mada. Marihina fa ahitana lalao anaty vondrona sy manasa-dalana ary famaranana ny dingana. Hisokatra ny 1 jolay ho avy izao ny fisoratana anarana. Mpandray anjara maherin’ny 200 no andrasana amin’izany. Ampahatsiahivina fa tsy ho diso anjara ihany koa ireo izay mendrika aorian’ny voalohany. Ho tolorana vola 1 tapitrisa Ariary ny faharoa ary 5 hetsy Ariary ny ny fahatelo.
Fitia Randria
French