”Ny Malagasy samy Malagasy no mandamina ny raharaham-pirenena. Ny avy any ivelany dia manohana sy manampy fa isika Malagasy no tompon’andraikitra amin’ny famaritana ny hoavin’ny firenentsika.” Io ny nambaran’ny Praiminisitra Rajanarison Mamitiana teny amin’ny Lapan’i Mahazoarivo, omaly, namory ireo sokajin-kery na olona manana solontena ao amin’ny komity teknika misahana ny fanomanana ny fikaonandoham-pirenena. Nohazavainy tamin’ny antsipiriany, tamin’ izany, ny didim-panjakana mamaritra ny andraikitra sy ny firafitry ny komity teknika. Eo koa ny antony sy ny tanjona lehibe amin’ny fananganana azy sy ny fanatanterahana ny fikaonandoham-pirenena. Fotoan-dehibe hiatrehana sy hamahana ireo olana fototra mampiverimberina ny krizy eto Madagasikara io ka tsy tokony havela handalo fotsiny, dingana manan-tantara ho an’ny firenena.
Aorian’ny fihaonana, hiverina any amin’ny sokajin-kery na olona misy azy avy ireo solontena, hifampidinika sy hanolotra ireo anarana hotendrena ho mpikambana ao amin’ny komity teknika. Asa masina ho an’ny firenena no namaritan’ny Praiminisitra ny andraikitr’izay ho ao amin’ny komity. Izy ireo no handinika sy hitondra tolo-kevitra amin’ireo lafin-javatra marolafy mba hahatomombana sy hahombiazan’ny fanomanana ary ny fanatanterahana ny fikaonandoham-pirenena. Tanjona ny hametraka sehatra hahazoan’ ny Malagasy miara-mandinika sy miara-mamaritra ary miara-manorina vahaolana maharitra ho an’ny firenena. Hiara-miasa amin’ny minisiteran’ny Fanavaozana sy ny FFKM ny komity teknika, izay eo ambany fiahian’ny Praiminisitra.
R. Nd.
French